जागतिक महिला दिनाच्या निमित्ताने ऊसतोडणी कामगार महिलांसाठी मोफत माहेरची साडी व आरोग्य तपासणी आणि औषधोपचार शिबीर.

शेवगाव प्रतिनिधी नरहरी शहाणे : गेल्या पाच वर्षांपासून उचल फाउंडेशन ही संस्था डॉ. गिरीश कुलकर्णी यांच्या मार्गदर्शनाखाली सन 2018 पासून ऊसतोडणी कामगारांसाठी शेवगाव येथे विविध सामाजिक उपक्रम राबवत आहे. गेल्या काही दिवसांपासून उचल फाउंडेशनच्या माध्यमातून शेवगाव व परिसरातील ऊसतोडणी कामगार व त्यांची शाळाबाह्य मुले यांचा सर्व्हे सुरू आहे. काल दि.८ मार्च रोजी जागतिक महिला दिन असल्याने दरवर्षी प्रमाणे उचल फाउंडेशन परिवाराच्या वतीने हा महिला दिनही काही ऊसतोडणी कामगार महिलांबरोबर साजरा केला गेला.

या वेळी उचल फाउंडेशनच्या सौ. सुजाता खेडकर यांनी महिलांच्या समस्या जाणुन घेण्याचा प्रयत्न केला असता, महिलांच्या आरोग्यविषयक अनेक गंभीर बाबी समोर आल्या. त्यात एका गरोदर मातेने ऊसाच्या फडात बाळाला जन्म दिला. बाळाची नाळ तोडायला जवळ काहीच नसल्याने कोयत्याने नाळ तोडली. एका मातेला बालविवाह आणि लवकरच लादलेल्या गरोदरपणाने दोनदा मृत अर्भक जन्माला आली. अनेक महिलांना क्षमतेपेक्षा जास्त ओझे उचलल्याने कमरेचे, मानेचे त्रास होत होते. काही महिलांच्या डोळ्यास ऊसाचे पाचट लागून दृष्टीही गमवावी लागली असल्या एक ना अनेक समस्या महिलांनी बोलून दाखवल्या.

आणि  अश्या काही घटना समोर आल्याने तात्काळ एक आरोग्य तपासणी शिबिर घेणे गरजेचे वाटले.  उचल फाउंडेशनचे विश्वस्त डॉ. मनिषा लड्डा व डॉ. संजय लड्डा यांच्या मार्गदर्शनाखाली  रोटरी क्लबच्या सहयोगातून या कामगार महिलांसाठी  तात्काळ एक आरोग्य तपासणी व औषधोपचार शिबिर घेण्याचे ठरले. दि. ९ व १० मार्च रोजी गंगामाई सहकारी साखर कारखाना (घोटन) ता. शेवगाव येथे हे शिबिर घेण्यात आले.

या वेळी उपस्थित सुमारे तीनशे पेक्षा जास्त ऊसतोडकामगार महिलांची पूर्णतः मोफत आरोग्यतपासणी  औषधोपचार देऊन प्रत्येकी एक माहेरची साडी भेट म्हणून देण्यात आली. तसेच यावेळी उपस्थित शंभरहुन अधिक ऊसतोड कामगार पुरुषांचीही आरोग्य तपासणी करण्यात आली. या आरोग्य तपासणीत प्रामुख्याने अतिश्रमाच्या कामामुळे महिलांच्या कंबर दुःखी, रक्त कमतरता(ऍनिमिया) हातपायास सूज व मुंग्या येणे, बालविवाह झाल्याने कुपोषित मुले किंवा मृत अर्भक जन्मास येणे. तसेच पुरुषांमध्ये वाढते दारू आणि मावाचे व्यसन, पोषक आहाराची कमतरता, यामुळे येणारा थकवा आणि कॅन्सर सारखे दुर्धर व्यधी, इत्यादी आजार प्रामुख्याने आढळले.

या शिबिरासाठी

डॉ. संजयजी लड्डा (जनरल फिजिशिअन),

डॉ. मनीषा लड्डा (स्त्रीरोग तज्ञ),

प्रा. अण्णासाहेब दिघे(लॅब टेक्निशियन),

डॉ. भागीनाथ काटे (फार्मासिस्ट),

डॉ.भरत गोरे (नेत्र तंत्रज्ञ सहायक),

सौ.सुजाता खेडकर (ICTC समुपदेशक)

आदींनी पुर्णतः मोफत वैद्यकीय सेवा दिली.

यावेळी कॉम्रेड संजय नांगरे हेही उपस्थित होते. तसेच उचल फाउंडेशन चे सिद्धार्थ लड्डा, सचिन खेडकर, महारुद्र खेडकर, अक्षय सरगुजर वैभव शिंदे यांनीही स्वयंसेक म्हणून काम पाहिले.  हॉटेल माथेरानचे गर्जे सर यांचेही मोलाचे सहकार्य मिळाले. खरतर कोणत्याही पूर्वनियोजनाशिवाय आयोजित केलेले हे शिबीर केवळ दि. ९ मार्चला एकाच दिवस घ्यायचे होते. पण महिलांच्या आरोग्य विषयक समस्या आणि त्यांनी दिलेल्या उत्स्फूर्त  प्रतिसादामुळे हे शिबिर १० मार्चलाही म्हणजे सलग दोन दिवस घेण्यात आले.