अहमदनगर (प्रतिनिधी)- वाळुंज (ता. नगर) पब्लिक स्कूलच्या वार्षिक स्नेहसंमेलन सर्वांना ओलाचिंब करणार्या पाऊस गाणीतून उत्साहात पार पडला. पाऊसाच्या विविध गाण्यांतून विद्यार्थ्यांनी निसर्गाचे नयनरम्य रुप, डोंगर माथ्यावरुन फेसाळणारे शुभ्रधवल धबधबे असा विलोभनीय पावसाळाच डोळ्यासमोर उभा केला.
गणेश वंदनेने कार्यक्रमाची सांस्कृतिक कार्यक्रमाची सुरुवात झाली. विजेच्या कडकडाटात आणि चिंब पावसाच्या सरीत सुमधूर गीतांमधून धुंद करणारा अनुभव उपस्थित पालक व प्रेक्षकांनी अनुभवला. विविध पाऊस गाणीवर एन्जॉय करताना चिमुकल्यांनी बहारदार आपल्या नृत्याचा कलाविष्कार घडविला. उपस्थितांनी त्यांना टाळ्यांच्या कडकडाटात दाद दिली. पावसाचे गार-गार थेंब अंगावर झेलताना रोमँटिक गाण्यांची साथ सर्वांना भारावून गेली.
स्नेहसंमेलनाचे उद्घाटन पारनेर पंचायत समितीचे माजी सभापती राहुल झावरे यांच्या हस्ते सरस्वती पूजन करुन दीपप्रज्वलनाने झाली. यावेळी विस्तार अधिकारी चंद्रकांत सोनार, कृषी उत्पन्न बाजार समितीचे माजी उपसभापती संतोष म्हस्के, प्रा. भाऊसाहेब रोहोकले, शिराढोणचे सरपंच दादा दरेकर, ह.भ.प. शेळके महाराज, माजी मुख्याध्यापिका कमल टेमकर, डॉ. पूनम कानवडे, प्राचार्या सोनल गायकवाड, पारनेर कृषी उत्पन्न बाजार समितीचे सभापती प्रशांत गायकवाड, सबाजीराव गायकवाड, प्राथमिकच्या मुख्याध्यापिका रुथ नायडू प्रमुख पाहुणे म्हणून उपस्थित होते.
प्रारंभी ढोलच्या निनादात लेझीम पथकाने पाहुण्यांचे स्वागत केले. प्रास्ताविकात प्राचार्या सोनल गायकवाड यांनी शाळेचा वार्षिक अहवाल सादर करुन, वाढत्या गुणवत्तेचा आलेख मांडला. तसेच विद्यार्थ्यांच्या सर्वांगीन विकासासाठी राबविण्यात येणार्या उपक्रमाची माहिती दिली. उपस्थित पाहुण्यांच्या हस्ते कला, क्रीडा व शैक्षणिक क्षेत्रात नैपुण्य मिळविणार्या गुणवंत विद्यार्थ्यांना बक्षिसे देण्यात आली. 2022-23 या शैक्षणिक वर्षाचा उत्कृष्ट शिक्षिका पुरस्कार मनीषा नागपुरे व उत्कृष्ट विद्यार्थी पुरस्कार पंकज वाळके यांना देण्यात आला. यावेळी मोठ्या संख्येने विद्यार्थी व पालक उपस्थित होते.
राहुल झावरे म्हणाले की, मुलांमध्ये दडलेले विविध कला, गुण ओळखण्याचे काम पालकांनी करावे. त्यांच्यातील क्षमता ओळखून त्या दिशेने प्रोत्साहन दिल्यास मुलांचे उज्वल भवितव्य घडणार आहे. ग्रामीण भागातील विद्यार्थ्यांमध्ये आत्मविश्वास निर्माण करण्याचे काम वाळुंज पब्लिक स्कूल करत आहे. सामाजिक बांधिलकी व तळमळीने गायकवाड परिवार योगदान देत असल्याचे त्यांनी सांगितले.
प्रा. भाऊसाहेब रोहोकले म्हणाले की, ग्रामीण भागातील गरीब शेतकर्यांच्या मुलांना इंग्रजीचे अद्यावत शिक्षण मिळण्यासाठी सबाजीराव गायकवाड कृषी विकास प्रतिष्ठानने वाळुंज पब्लिक स्कूलची मुहुर्तमेढ रोवली. या शाळेच्या माध्यमातून उत्तम प्रकारे विद्यार्थी घडविण्यात येत असल्याचे त्यांनी सांगितले. दादा दरेकर म्हणाले की, मागील वीस वर्षापासून वाळुंज पब्लिक स्कूल ग्रामीण भागातील विद्यार्थी घडविण्याचे कार्य करत आहे. गायकवाड परिवाराचे कृषी व शिक्षण क्षेत्रातील योगदान प्रेरणादायी असल्याचे त्यांनी सांगितले.
विस्तार अधिकारी चंद्रकांत सोनार म्हणाले की, ग्रामीण भागात शिक्षण संस्था चालवणे कठीण काम आहे. मात्र गुणवत्तेने हा शिक्षणाचा वटवृक्ष बहरला असल्याचे त्यांनी स्पष्ट केले. कार्यक्रमाचे सूत्रसंचालन नामदेव लिंबोरे व गणेश खुडे यांनी केले. आभार गणेश दरेकर यांनी मानले. कार्यक्रम यशस्वी करण्यासाठी सर्व शालेय शिक्षक व शिक्षकेतरांनी परिश्रम घेतले.
